Tòca-Maneta 143 – Kiwipèdia

Chaspaires de maneta, picanhaires de botons, balhaires de jòia a stick e esportius de canapè, adissiatz !

Dins la categoria « Sabers del Monde » aprenguèri recentament qu’en Nòva Zelanda bòtan a contribucion la fauna locala per rendre de menuts servicis a la collectivitat. Es que n’aprenèm de totas las colors dins los videojòcs ! Mas ara qu’i pensi es qu’es pas un pauc estranh de far trabalhar amassa un uman (qu’aurà passat l’atge de la retirada saique) dos kiwis (l’ausèl, pas la frucha, de qu’avètz pas comprés dins « fauna »), un pofre e de casoars (una marrida bèstia que trobam en Indonesia e un bricon en Australia, mas pas en Nòva Zelanda, coma un virolet sus Wikipèdia m’o ensenhèt) ? De fait m’avisi que KeyWe seriá quitament pas un jòc neozelandés, mas american, de monde que – o sabèm – an de progrèsses a far en « Sabers del Monde ». Tornam començar.

Lo mèstre del luòc nos deu testar abans servici, urosament es lèu fait.

Per ieu que mon grand èra òme de letras – las portava – es totjorn una emocion prigonda de veire de novelaris tornar préner lo flambèl e perpetuar l’èime del servici public e de l’interès collectiu, en èssent pagat una misèria en fruchas amb d’oraris d’usina los quites jorns caumats e per las fèstas.

Un jòc simpatic ont cal trobar los indicis per plegar lo paquet coma cal.

Sembla doncas qu’al Bacin Bungalow, contrada imaginària ont pòt tan far de tempèstas de sable coma de nevejadas iamalaianas, son demorats un pauc a l’ancian temps que desconeisson l’email per servar una passion del corrièr o del quite telegrama e de la pòsta a caval… a casoar. Dins KeyWe jogatz, forçadament a dos senon pas cap d’interès, dos ausèls kiwis, primièra originalitat manhaga d’un jòc que ne manca pas, recrutats pel vièlh gerent de l’ofici de las PTT local.

Un autre jòc simpatic ont se cal plan partejar las tascas !

Per una rason que, en tota logica, m’escapa totjorn, lo corrièr papièr es de mòda al Bacin Bungalow e las novèlas recrutas auràn de qué far, e pro lèu. KeyWe s’embarrassa pas de longors o de cinematicas esperlongadas per vos botar còpsec lo pè a la cadena. E en ritme, se vos plai !

+ 25 punts sus la nòta finala per aver integrat lo Kakapo ! Se coneissètz ma passion de la bèstia, comprendretz perqué.

KeyWe compta 4 tipes de nivèls principals diferents, declinats sus 3 sasons, lo ritme del calendièr ten doncas una importància màger : picar un messatge sus un clavièr, compausar de corrièrs amb de copaduras de mots al biais de las letras anonimas, far de tria postala o s’ocupar d’empaquetar de còlis. Se la basa de cada tipe de jòc es simpla e s’aquesís lèu e aisidament, cada jorn que passa ne vei arribar una version novèla, que de còps desemposca plan la formula, en i apondent d’elements suplementaris, de dificultats, de comptadors de temps, o un caprici d’aqueles escagassaires de casoars (per compréner mon asirança per la bèstia rendètz-vos mai de 100 Tòca-Maneta en arrièr).

Un jòc ont cal noirir los casoars. Foguèssi pas que de ieu, los daissariái crebar de fam mas bon...

En aquò KeyWe es d’aquela mena de jòcs en cooperacion simples d’accès mas malaisits de mestrejar : l’acordança es la clau, lo temps es l’enemic e se acabar un nivèl amb un temps onorable pren de còp qu’un ensag, daverar la medalha d’aur pertot tocarà a l’impossible. Aürosament i a pro per se far de ben, sens versar dins de mòdes de jòc que nos faràn de mal. Aital als quatre mòdes principals s’apondràn de minijòcs bònus variats, un pauc mens religables al monde de la pòsta mas regaudissents parièr. Permetràn de recuperar de sagèls que comptaràn coma de punts per desblocar d’afétias nòvas per nòstres emplumats (capèls, sacas, raubas…) e de versar dins la colleccioniti, coma totes los videojòcs del genre. Tanplan trobaretz d’objèctes amagats dins los nivèls, que mancaràn pas de lançar de sequéncias plan amusantas que vendràn trebolar la rotina installada, necessària a acabar un nivèl.

D'objèctes amagats son de descobrir e colleccionar dins los nivèls.

L’ambient de KeyWe es fresc, generós e benvolent, sens capvirar la tièra dels jòcs en cooperacion (totjorn tròp redusida trobam) i pren una plaça de tria, que s’amerita per sas animacions manhagas, son environament calorós e son principi alucat juste çò que cal.

Cal espetar de papièr botiolat dins aquel minijòc ? + 5 punts sus la nòta finala !

Segur qu’al cap de cinc minutas, veire amusat·da vòstre kiwi se daissar tombar de cuol sus una tòca de maquina per escriure, carrejar una envolopa dos còps son envergadura dins son bec long e fin o se tornar paracasudar sul terren de jòc perque aurà trepejat dins un trauc vos convencerà de passar qualques minutetas de mai amb la gaujosa còla.

Cada succès es recompensat amb de sagèls, utiles per crompar de vestits pels kiwis. Inutiles doncas.

Sus aquò vos daissi, me cal tornar a l’entraïnament de mon casoar de companhiá. Fa qualques jorns qu’ensagi de lo domdar a portar al vesinatge de reclama per mas cronicas, pel moment me soi sonque reculhit de grafinhadas als pompilhs e un còp de clèsc (lo sieu) sus la clòsca (la mieuna).

KeyWe

Data de sortida

31 d’agost de 2021

Supòrt(s)

PC / Mac / PlayStation 5 / PlayStation 4 / Xbox Series / Xbox One / Switch

Genre

Accion / Cooperacion

Desvolopaire / Editor

Stonewheat & Sons / FireShine Games

  • Rendut Visual
  • Scenari
  • Jogabilitat
  • Banda son
  • Durada de vida

%

Taus de Contentament Gahussenc

Lo Sentit del Gahús

Jòc de cooperacion manhac amb de bonas idèas de minijòcs. Estrahament repausant e estressant a l’encòp.

Tòca-Maneta 142 – Subreliminal

Chaspaires de maneta, picanhaires de botons, balhaires de jòia a stick e esportius de canapè, adissiatz !

La realitat es definida per nòstra percepcion e sonque nòstra percepcion ? Existís una realitat que podèm pas percebre ? O arriba que nòstras percepcions nos enganen e nos fagan sentir quicòm qu’es pas real ? Avètz doas oras, çò qu’es a pauc près una de las duradas possiblas per acabar Superliminal (se pòt boclar en mens de temps pr’aquò). E en tot cas sos creators, Pillow Castle Games (lo castèl de coissins, anatz veire qu’es predestinat) causiguèron de respondre a aquelas interrogacions per : òc, lo sòmi. Per eles lo sòmi permet de modelar son environament en desfisant la geometria euclidiana que nos es costumièra. D’un costat es vertat, de l’autre… cadun fa pas de sòmis coma los que son mostrats dins Superliminal.

"Perception is Reality" e o veiretz lèu en agafant un objècte pausat sus la taula.

Subjècte de tèst d’un programa sonat Somnascult dins una clinica especializada, nos trobam lèu, amb Superliminal, dins un biais de conflicte filosofic relatiu a çò qu’es la realitat entre lo Dr Pierce e l’intelligéncia artificiala que l’assista e qu’evocarà, a aqueles e aquelas que coneisson, Glados de Portal. Nos calrà escapar del milafuèlha de sòmis dins lo qual avèm cabussat e que totes nos opausan de copacaps subrerealistas.

Aquí per exemple, mai lo cube es pausat luènh de vos, mai serà pichon, e lo contrari.

Cadun dels 9 nivèls de Superliminal comença pauc o pro parièr : nos desvelham dins un cambròt, atudam lo radiorevelh, e nos lançam dins un corredor. De fait tot Superliminal se correrà mai que se percorrerà, s’agís d’avançar, totjorn avançar, cap a la fin del nivèl per tal de passar al seguent. Sul camin, d’enigmas vos esperaràn per vos petar lo cap e metre vòstres meninges a ruda contribucion.

Lo percors daissar entreveire los trabalhs preparatòris de l'experiéncia.

Es forçadament malaisit de descriure lo tipe d’enigmas que prepausa Superliminal e que ne fan la sal, vist que son totas o quasi basadas sus l’ambigüitat entre la prigondor e la perspectiva, la perspectiva forçada, e los engana-l’uèlh.

Un cube de talha mejana es pausat al mitan de la pèça ? Agafatz-lo. Entre vòstras mans, serà pichon se vòstre uèlh lo vei de près, o bèl se lo vesètz de luènh. Es aital possible de cambiar la talha dels objèctes agafables dins lo jòc, per tal de se’n far d’escalièrs, de petar un bocin de decòr o d’aviar una seria d’accions a las consequéncias pas totjorn previsiblas.

Ensag d'efèit d'optica.

La màger part de las enigmas son « impossiblas », perque son irrealistas, perque demandan de crear de paradòxas. Malgrat aquò, e tanben perque las interaccions son finfinala limitadas dins Superliminal, deuriatz pas tròp susar per vos tirar d’afar, quitament s’avètz de mal amb la geometria dins l’espaci. E doncas paradòxa : avèm un jòc luènh d’èsser impossible, amb d’enigmas ditas impossiblas. Mas fau lo besuquet.

Superliminal val mai que mai per la passejada dins sos corredors sens fin, dins sos decòrs traucables, a s’amusar amb de dats, de pions e las perspectivas que coma vertadièr jòc d’enigmas, que ne coneguèrem de mai fornits (e mai peluts). Empacha que son principi es fòl, sa fisica regaudissenta, e se capita jamai vertadièrament de rebutar autrament qu’amb doçor las termièras mentalas, d’unas enigmas an la capacitat de nos fotre de cuol.

Cal imaginar que SÈM dins l'ostal que vesèm aquí davant...

De sequéncias son plan realizadas, amb d’encadenaments cabords de traucs, de casudas, de laberintes, de falsas semblanças, d’afondraments d’objèctes corrents, anormals sonque per lor talha o lor emplec. Amb aqueles moments, Superliminal capita d’evocar lo sòmi conscient, amb sa mescla d’elements ordinaris desvirats de biais extraordinari. La frasa que vesèm inscrita pertot, « la percepcion es la realitat », pren enfin son sens.

Auretz regularament dreit a de comentaris metafisics.

Superliminal multiplica pas las enigmas genialas, a un pauc tendéncia a se repausar sus sa nòta d’intencion, originala o cal ben dire, es un pauc cort e convida mai a la contemplacion qu’a l’accion, çò que nos butariá a lo rengar dins lo tirador de las experiéncias videoludicas mai que dins aquel dels jòcs vertadièrs (coma de títols en realitat virtuala). Mas çaquelà, nos disèm que sa concepcion e sa realizacion de còps destimborlanta deguèron representar una escomesa tecnica incredibla, e per aquò val lo còp d’i getar un uèlh.

Atencion, se l’uèlh getat en question dobla de volume e acaba per servir de pion sus un escaquièr gigant, la direccion denegarà tota responsabilitat !

Superliminal

Data de sortida

12 de novembre de 2019

Supòrt(s)

PC / Mac / PlayStation 4 / Xbox One / Switch

Genre

Copacap

Desvolopaire / Editor

Pillow Castle

  • Rendut Visual
  • Scenari
  • Jogabilitat
  • Banda son
  • Durada de vida

%

Taus de Contentament Gahussenc

Lo Sentit del Gahús

Superliminal es un pauc decebent, malgrat un principi de tria. Sas mecanicas aurián ganhat d’aver un scenari mai equilibrat e finfinala mai de dificultat dins las enigmas per venir un grand jòc del genre.