Tòca-Maneta 145 – Fèr

Chaspaires de mirguetas, picanhaires de lasèrs, balhaires de pastèla en boita e arpaires de canapè, adissiatz !

Me soveni pas qual èra lo filosòfe que disiá, la mina embeguda, « ieu voler èsser gat ». Mas aviá fotrament rason. En qualques annadas, los gatons son venguts (o tornats dirián d’egipcians de ma coneissença) de novèlas divinitats domesticas. La manhagariá a posita, al cap del canapè, contràriament al panda rossèl que se cal motivar a anar veire dins son abitat natural, al zòo. Ausissiái l’autre jorn de cercaires parlar del fait que se los gosses èran estudiats dempuèi longtemps, que costejan los umans plan coma cal, la relativa distància (distància d’aitant mai relativa se dobrissètz una boita de Sheba®1 dins un rai de 5 quilomètres d’un parelh d’aurelhas peludas) que los felins entretenián autres còps amb nòstres interiors los ennivola d’una part de mistèri, a pena levat per la mirgalhada d’autars virtuals auborats sus Internet e lo culte mondial aferent.

Tot comença plan, amb un gat que gateja amb d'autres gats.

Ieu qu’ai l’astre d’èsser l’urós coproprietari d’un grafinhaire mai o mens adomergit, es vertat que m’arriba de me pausar la question : de qué se passa dins lo cap d’aquela bèstia qu’es fotuda de dormir en un redond ginmnasticament perfieit 18 oras per jorn en roncant coma una usina de Friskies®2 puèi d’anar bramar al pè del cabinet de croquetas d’un pas lèste e assegurat ? L’aligança fait bèstia entre l’elegància e lo patoflitge m’estabosís a de bon.

E aup, un topin de pintura pel sòl. Pas al bon endreit, pas al bon moment...

Cresi que los desvolopaires (montpelhierencs) de Stray avián, eles tanben, lo cap plen de questions que lor jòc es un ensag d’estudi videoludic de çò que fa un gat e coma se mòu. L’equivalent al sègle 21 d’aqueles filmòts, sabètz, ont se decompausavan los moviments d’un caval.

Lo camarada B12, l'amic que nos fasèm en viatge.

Una brava part de la comunicacion de lor jòc se faguèt sus aquò justament, coma una brava part de son succès, notable per un afar independent aital. Jogar a èsser un gat pensat, servit coma un gat, qu’agaita e explòra lo monde amb sos uèlhs lusents de gat ten una tasta incomparabla coma produit d’apèl. Per çò qu’aquò vòl dire que podètz sautar, escalabrar, funambular, çò qu’es utile, mas tanben realizar tota una panoplia d’accions sens autra tòca qu’aquela de vos esboçar un riset atendresit sus vòstras pòtas de mamifèr empatic : far sas arpas sus un tapís, sus un montant de fautuèlh o sul bas d’una pòrta per la nos fa obrir (abans evidentament de cambiar sulpic d’idèa, notaretz lo realisme comportamental), jogar amb de pelòtas que rebalan, far tombar de botelhas en equilibri precari en bòrd de taula d’un còp de pata amusat e falsament innocent, abans de se colcar en redond sus un coissin moflet e de ronronejar. I a quitament un boton que servís pas qu’a miaular per atirar l’atencion !

L'ambient es capitat.

Simulador de gat en passejada, Stray ofrís pas per son eròi lo nivèl ultime de beutat tecnica (mas soi pas jamai estat convencut pels gats videoludics, i a encara de trabalh de far visualament), mas l’imitacion dels comportaments felins o rescata tot.

Credible.

Sus quò vos daissi, es lo moment que, lo còr sadol d’afeccion pels margauds a vibrissas aprèp qualques oras a landrar dins Stray, vau anar coar de l’uèlh lo gat que ronca sus la coina.

Qué, l’istòria ?

Bon, d’acòrd, i tòrni. Amai i a d’aspèctes de Stray, en defòra de tot çò evocat çai-sus vòli dire, puslèu originals. Lo jòc comença quand nòstre gaton tomba de naut dins una ciutat futurista barrada, sens accès al jorn. Desseparat de sos companhons, li calrà doncas tot tornar montar e en camin n’aprendrà mai sus la vila e sos estatjants, totes de robòts umanoïdes. Ont son passats los umans ? Perqué los robòts semblan se contentar de lor situacion ? Lo scenari es pro simple – sèm dins un pichon jòc independent o rapèli – e se debana sens parada en dos parelhs d’oras, amb çò que cal d’accion e de peripecias. Lo gat encontrarà de robòts amistoses ma fe fòrça simpatics e lo pichon B12, un dròne que l’acompanharà pertot e li servirà de guida e d’interprèt.

Los robòts rescontrats an totes una personalitat pròpia, n'i a pas 2 parièrs.

La ponhada de quartièrs visitats mòstran una vila visualament trabalhada, amb sa vida, sas ensenhas a neon qu’esclairan de pèças de metal rovilhadas, sas andronas escuras, sas botigas d’inspiracion asiaticoamericanas. S’i esperava pas aquí quand òm nos vendiá una istòria de gaton realista, mas lo decòr cyberpunk es una capitada emai foguèsse tengut per de zònas redusidas lèu percorregudas. Pus estonant encara, çò qu’auriá degut èsser una contradiccion entre l’animalum natural que nòstre eròi pelut representa e lo monde robotic, e doncas forçadament freg, dins lo qual evoluís, s’encranca plan en realitat, duscas a començar de veire ponchejar de brigalhs d’umanitat, d’emocion, aquí ont ne deviá pas pus aver.

Aquel d'aquí per exemple es un conàs.

O, per resumir : Stray, vendretz pels gatons, demoraretz pels neons !

Sus aquò vos daissi, e vos remandi al « sus aquò vos daissi » mai naut : es totjorn d’actualitat e ai la canha. D’alhors ara qu’i pensi, deuriam pas puslèu dire « la gatanha » ? Me sembla mai logic.

1 Aquesta cronica es esponsorizada.

2 Ensagi de far jogar la concurréncia entre los esponsòrs.

Stray

Data de sortida

19 de julhet de 2022

Supòrt(s)

PC / PlayStation 5 / Playstation 4

Genre

Aventura / Plataformas

Desvolopaire / Editor

BlueTwelve Studio / Annapurna Interactive

  • Rendut Visual
  • Scenari
  • Jogabilitat
  • Banda son
  • Durada de vida

%

Taus de Contentament Gahussenc

Lo Sentit del Gahús

Jòc del còr luènh d’èsser revolucionari dins sas mecanicas, Stray vòl mai que mai prepausar d’incarnar un gat coma s’èra rarament vist, e tanben pausar un ambient futurista mai calorós qu’inquietant. E aquò i arriba plan.

Tòca-Maneta 144 – La ciutat deslembrada

Chaspaires de maneta, picanhaires de botons, balhaires de jòia a stick e esportius de canapè, adissiatz !

Dins l’istòria videoludica i a d’esquinces que son totjorn presents, de decepcions qu’oblidam pas, e mai las annadas aguèsson passat a ramadas. Ieu ai una dent, pichona vos rasseguri, contra çò que foguèt, al mens en França, una mòda passadissa : aquela dels jòcs istorics « Réunion des Musées nationaux » . Soi segur que los coneissètz, que n’i aguèt qualques uns, e dins totes los ostals d’entre 1995 e 2000 ne trainava al mens una còpia, entre lo CD-Rom de l’enciclopèdia Encarta e qualques demostracions obtengudas en present dins un magazine. Qu’aquò siá Versailles, Égypte, Chine, lo principi èra totjorn un pauc lo meteis, amb una enquèsta policièra de menar dins un contèxte istoric reconstituit. Jol mascaratge ludic, un pauc grossièr e somari s’o gaitam de uèi lo jorn, èran plan de jòcs « a contengut cultural », qu’èran aquí per nos ensenhar de causas, quand plan segur tot çò que voliam èra estroncar de zòmbis a la tronçonadoira. Mas aquò èra un compromés dins plan de familhas : los dròlles avián lor jòc vidèo, e los parents l’esperit repausat. Pas intrinsècament marrits, aqueles jòcs patissián çaquelà de ritmes un pauc tròp plan-planets e d’una profusion de fichas coma de cartelons de musèus que venián destorbar l’immersion e l’aspècte ludic. Dempuèi aquela epòca degun s’èra jamai vertadièrament fretat al biais de far, amb un jòc istoricament precís e pasmens… ben un jòc qué.

Karen vos aculhís en debuta de jòc. Res d'anormal, EVIDENTAMENT.

Amb The Forgotten City pasmens aguèri lèu l’impression qu’i èran arribats, a superar de mèstres que segurament ne son pas pels desvolopaires, a articular de biais engenhós una enquèsta a la policièra e un contèxte istoric menimosament reconstituït.

Lo contèxte es Roma. Enfin, pas exactament, que jogam un tipe de nòstre temps que se desvelha sus la riba de Tibre, en Itàlia, pas luènh de roïnas romanas. La femna qu’es aquí s’inquieta per un autre gus que s’i es anat pèrdre e nos demanda de lo retrobar. Al cap de qualques passes… cabussam dins una ciutat avalida e mitat sosterrana, sens possibilitat de tornar pojar ! Segond mistèri : d’estatuas dauradas, estranhament realistas, pòblan los luòcs, e totas an l’aire espaurugadas per quicòm. Lo fantastic se fa pas esperar gaire, pel biais d’un portal, que nos mena dirèctament… dins la ciutat de l’epòca, valent a dire l’Empèri roman de Neron-las-aluquetas.

E Galerius vos aculhís dins la ciutat. Es un dels personatges mai simpatics.

Lo magistrat d’aquela ciutat, oblidada de son quite temps, nos aculhís, e nos explica son problèma : dins sa vila senhoreja una malediccion mistica, la Règla d’Aur, resumida en « la societat perirà per la fauta de l’individú », çò que la ponhada d’estatjants, e lo magistrat primièr, interprètan en « se qualqu’un merdeja, tot lo monde i passa » e, efectivament, nòstras primièras constatacions donan rason a aquela teoria. Balin balan, compausan amb la Règla d’Aur, mas lo magistrat es estat assabentat que qualqu’un, un pecador, l’anava trespassar, per aquò metèt en plaça, pel biais d’un sortilègi, un portal, aquel que nos faguèt venir e que nos permet de « boclar », es a dire de tornar començar la jornada al primièr crime cometut.

La lutz, l'arquitectura, tot es pro capitat, quitament se l'environament es estreit.

Se daissam de costat aqueste element fantastic, la reconstitucion istorica es fòrça interessanta. Cada element de l’environament sembla sortit d’un musèu, rejovenit e botat a sa plaça reala e, se la ciutat es pas granda que sèm davant una òbra independenta que mobilizèt un manat de personas pas mai, es bastida d’un biais realista, amb los aquaductes, los temples, las villas e los barris mai basses. Los elements culturals son pas integrats al calçapè mas escampilhats dins lo decòr o dins la boca dels personatges, totes remarcables, que se faràn un plaser de vos contar lor istòria personala e lo contèxte sens èsser jamai anujoses.

Lo magistrat de la vila a mestièr de vos, es el que lança l'enqusèta.

D’aquel costat The Forgotten City gausa quicòm que me sembla relativament pauc tractat dins las òbras culturalas : mostrar la realitat del sincretisme a la romana, dins çò que, per nòstres uèlhs d’ara, pòt aver de plan amb l’integracion d’autres pòbles a la societat, o de mens plan, amb un colonialisme e un imperialisme çaquelà plan presents. Aquel sincretisme serà d’alhors un element màger de l’intriga.

Aquò servís pas de res, es sonque aquí per la cultura G. Dins ton cuol la Réunion de Musées de France !

Crosarem doncas de soldats, de rics, de paures, de comerçants, una preiressa, de grècs, d’egipcians, un josieu, qualques crestians desiroses d’escapar al chaple… Fait fòrça amusant dins un jòc que manifèsta de traits d’umor imprevistes, lo jòc es doblat en anglés sonque, mas amb una diversitat d’accents que ja dison quicòm : lo gladiator es un cockney, los patricians an una lenga mai elevada, los « estrangièrs » fan pas l’esfòrç de prononciar coma cal. E nos podèm pas empachar de pensar qu’amb un doblatge francés tot aquò auriá perdut de sa varietat ! Se vos pausàvetz la question, òc, lo fait que s’exprimiscan en anglés es justificat pel scenari, coma tot çò que poiretz trobar « a costat » d’alhors, a un punt dessenat que revèrta lo temps e la precision que calguèt per afinar aquela istòria de bocla temporala, de dieus… e d’umans.

Un vièlh filosòfe, dins una balma... tot es a sa plaça.

D’umans etics e d’autres mai gusards, cadun amb son idèa sus la Règla d’Aur, sus çò qu’es lo pecat o çò qu’es permetut, sul ben, sul mal, e serà pas rare que las discutidas viren conversacions socraticas a l’anciana sus la morala, lo juste, l’injuste, l’arbitrari divenc… Ont s’amaga la filosofia !

Los qualques interiors accessibles son rics tanplan coma lo defòra.

Entre tot aquò calrà navigar, per tal de resòlvre nòstra enquèsta, un pauc a rebors que la tòca ne serà de definir çò que serà lo crime que menaça la vida de totes los ciutadans, mai que d’espinglar un criminal. Nòstra enquèsta, absoludament passionanta, nos convidarà aital a nos interessar a cada personatge cadun son torn, a sa rotina, a sos interèsses, per tal de l’eliminar (o pas) de nòstra lista de suspèctes. Aital, dins sa construccion, plan mai qu’als jòcs « Musées nationaux » evocats mai naut, The Forgotten City sembla a Return of the Obra Dinn, ja cronicat aicí. Fa pas de dobte que los e las que presèron l’enquèsta navala al sègle 19 presaràn l’enquèsta romana del sègle 1.

Sul mercat crosam de monde de tot l'Empèri e comprenèm melhor cossí son integrats los pòbles estrangièrs.

Evidentament, mai d’un revirament de situacion nos espèran, e lo prètzfait del debut s’alonharà pauc a pauc per daissar la plaça a de cases de consciéncia, de copacaps e de crèbacòrs. Fins a la fin, The Forgotten City, mèstre absolut de son ritme e de sa narracion, vos gardarà atalentat·da·s e, per pas vos gastar lo plaser ne pòdi malastrosament pas dire gaire mai, o planhi !

Pas de bon jòc sus la Roma antica sens grafitis procassièrs !

Una estonanta reüssida per un jòc que comencèt coma un mod (un ensemble de fichièrs modificators per tal de fargar un derivat, creats per la comunautat de jogaires) del jòc Skyrim !

Sus aquò vos daissi, me cal anar en vila amb mas bariòtas plenas d’estatutas en aur veire se i a mejan de ne tirar un bon prètz al pes.

The Forgotten City

Data de sortida

28 de julhet de 2021

Supòrt(s)

PC / PlayStation 5 / Playstation 4 / Xbox Series / Xbox One / Switch / Stadia

Genre

Aventura / Enquèsta

Desvolopaire / Editor

Modern Storyteller / Dear Villagers

  • Rendut Visual
  • Scenari
  • Jogabilitat
  • Banda son
  • Durada de vida

%

Taus de Contentament Gahussenc

Lo Sentit del Gahús

Fòrça plan fotut, amb pertant de mejans limitats mas una tòca e una ambicion mesurada e complida a 100%, The Forgotten City es un jòc remirable, qu’agradarà primièr a las personas apassionadas d’Istòria, d’enquèstas, mas tanben a tote·a·s lo·a·s curiose·a·s. Es pas long, i cal anar !