Lo Libernors

LibernorsLa Revolucion es una chausa seriosa, mas manifestar sens aver begut un còp, quò, quo es pas serios. Lo Libernors pensa que lo pais serà sauvat quand i aurà daus bars a chasque canton de charriera e bastis un project de colcòz e de cava cooperativa autò-gerits per sauvar la Losèra de la desertificacion. Los autres pensen que lo Libernors es nonmas un bandaire comunista. Question de punt de vuda, segurament.

Lo Felinors

Felinors

Lo Felinors figura desjà dins lo recòrd mondiau de la mai lonja siesta (mai de 150 ans !). Fau dire que lo banquet que l’a precedida valia quauquarren. Lo Felinors espera enquera que Frederic Mistral li apareisse en raibe per li dire que far, sens resulta per lo moment. Aquò dich, quò fai un moment que degun a verificat qu’era plan en trin de durmir e que s’era pas estofat dins son som emb un òs dau jau bulhit de la darriera Sent-Matuvist a Tralut-sus-Argença.

L’Occitanors

Occitanors

La basa. Un anar volontari, un sosrire de fisança, barra los uelhs, talament es segur d’ente vai. Quò fai chaud au cur. Bon per contra, i a doas chausas que vesem pas :

1) Lo trauc que ven davant sos pès

2) Son cuol, fotut « coma la bandiera del Japon » per causa d’una gimnastica per tròp fisica, mas necessària. La discutida d’egau a egau coma las institucions es a queu pretz, que paia emb onor, fiertat, e un pauc de plaser tot parier. Puei marchar coma un garçon vachier quò t’a un estile inimitable.

Los Potonors

PotonorsApres l’aficha (oficiosa) de la manif, ai contunhat sus ma lançada, per la bona rason que un potonors quo es aisat de dessenhar. Puei tot lo monde aima los potonors, non ? Aqui una frisa que representa la granda familha (un pauc endarrierada) de l’occitanisme politic e associatiu. Vos bòte lo detalh daus personatges en seguir, se per cas n’i a un que vos interessa en particular. Io vos balhe l’autorisacion d’en far çò que voletz. Per contra, l’entrepresa americana qu’a lo drets, quo es mens segur…